LAOAG CITY – Inpakaammo ni Dr. Loida Valenzuela, ti Provincial Veterinarian nga umaboten iti nasurok 100 nga aso ti nagpositibo ti rabies ditoy probinsya.
Segun kenni Valenzuela, daytoy ket nairekord da manipud bulan ti Enero agingga iti Setyembre ita a tawen.
Inpalgak na a kaadoan kadagiti kaso ket manipod iti ciudad ti Batac, ciudad ti Laoag, ili ti San Nicolas ken Paoay.
Inlawawag na nga iti kadagupan a bilang dagiti aso a positibo iti rabies positive 32 ti awan ti nakagat na a tao a kayat na a sawen ket stray dogs dagitoy wenno awan ti akin-taraken.
Inbatad na a kadagiti met positibo iti rabies nga aso nga adda ti nakagat na nga aso ket awan ti nairekord a pimmusay.
Kabayatanna, immapela ti provincial veterinarian kadagiti kakailian a no adda ti makagat iti aso ket dagus da a mangited ti sample iti opisina da tapno maamoan nu positibo iti rabies wenno saan.
Rakurak daytoy ni Valenzuela kalpasan a naamoan na a dagiti 12 nga indibidual a pimmusay iti kallabes gapo iti rabies ditoy probinsiya ket maibilang a suspected rabies cases laeng gapo ta dagus a napapatay ken naikali dagiti aso a nakakagat kadakuada.
