LAOAG CITY – Nangisayangkat ti kaunaan a jetski flag ride ti civil society coalition nga ”Atin Ito” iti kabaybayan nga asideg ti Pag-asa Island kas paset ti maikapat acivilian mission iti West Philippine Sea (WPS).
Indaulwan ni Akbayan Rep. Dadah Kiram Ismula ti aktibidad, a basar iti grupo ket mangisimsimbolo iti soberanya ti Pilipinas iti nasao a lugar.
Basar iti Atin Ito, nangrugi ti misyon iti oras ti alas-5:40 ti bigat no sadinno a naglugan iti rubber boat ti bassit a grupo dagiti boluntaryo sakbay nga insayangkat ti jetski ride.
Balligi a naingato da ti bandera ti Pilipinas iti Pag-asa Cay 2 iti baet ti nadagsen a presensiya ti China iti lugar.
Kabayatanna, adda ti report nga inakusaran ti China ti Pilipinas ti illegal nga iseserrek iti paggiinnagawan a paset ti kabaybayan.
Basar iti China Coast Guard, lima a Pilipino ti maipagarop a nakita a nagdisso iti lugar.
Iti met biang ti Pilipinas, inbatad dagiti otoridad a nangipatulod da kadagiti coast guard personnel kalpasan a nakaawat da ti report nga adda dagiti Chinese personnel nga immuna a nangingato ti bandera da iti sandbar.
Rumrumuar a maipagarop a banbantayan ti presensya dagiti barko ti China a mapagat-atapan a mangisaysayangkat ti illegal a panagsukisok iti uneg ti Philippine waters.
Iti sabali nga statement, inbatad ti ”Atin Ito” a maysa a barko tiPeople’s Liberation Army Navy, maysa a Jiangkai II-class frigate, ti immasideg iti grupo da kabayatan ti panangisayangkat da ti aktibidad.
Basar iti grupo, umabot iti mapatta-patta a 1,000 a yarda ti kaasideg ti nasao a barko iti ML Chowee, ti barko a nangideploy ti jetski manipod iti MV Kapitan Oca.
Maipagarop nga immasideg pay daytoy iti kaadayo a dua a nautical miles manipod Pag-asa Island.
Nangrugi idi Abril 30 ti civilian mission ti Atin Ito ken agpaot agingga iti Mayo 5 ita a tawen, no sadinno a karaman kadagiti aktibidad da ket ti panagibunong ti taraon, gasolina, medical outreach, cultural events, ken island tours.
