LAOAG CITY – Inpetteng ni dati a Presidential Spokesperson Harry Roque nga awan ti pagibasaran dagiti reklamo nga inpila kontra kadakuada ti Bureau of Internal Revenue (BIR).
Inbatad ni Roque, awan ti aniaman a napasamak a panangiyisyu ti shares ken naisubmitirda ti amin a tax returns maiyataday iti linteg.
Pinilaan ti Bureau of Internal Revenue ti willful attempt to evade taxes ken failure to file tax returns iti babaen ti National Internal Revenue Code of 1997 da Roque ken ti asawana pakairamanan ti legal counsel-da a ni Percival Ortega iti Department of Justice (DOJ).
Basar iti Bureau of Internal Revenue, daytoy ket gapu ta immabot iti sumurok P3.35 million ti saanda a nabayadan a buis ken dagiti interes dagitoy.
Nupay kasta, kuna ni Roque a paset laeng daytoy ti agtultuloy a panangpulitika ken harassment gapu ta maipagarup a kaalyado isuda dagiti Duterte.
Iti agdama, kunana nga usarenda ti amin a legal remedies ken kumpiansa ti kampoda nga awan ti linabsingda a linteg.
