LAOAG CITY – Inlawlawag ni Atty. Jason Perera ditoy siudad ti Laoag ti pannaka-acquit dagiti dadduma a kaso ni dati a Mayor Jessie Ermitaño.
Segun ken ni Perera a legal counsel ni Ermitaño, uppat a kaso ti nalusutan ti dati a mayor.
Inbatad na a kangrunaan ditoy ti kaso na maipanggep iti panagikot ti armas kalpasan a naruay a klase ti armas ti nakumpiskar kenkuana idi naiyuswat ti search operation iti pagtaengan na, addan sumagmamano a tawen ti napalabas.
Inpakaammo ni Perera a ti pannaka-acquit ti nasao a kaso ket gapu kadagiti inpasa da iti korte nu sadino a nadakamat ti nalabes a panagoperasyon dagiti otoridad iti baet a saan a nakailanad iti searach warrant nga inparuk-at ti korte.
Kabayatanna, kuna ni Perera nga adda pay dagiti kaso a manarimaan ti pannakatratar na iti korte kas iti murder ken explosive case ti dati a mayor.
