LAOAG CITY – Inlawlawag ni Atty. Charito Malicad, mangidadaulo ti Communications and Media Office ken Acting City Tourism Officer ditoy siudad ti Laoag no apay nga awan ti nagan ni Sangguniang Panlungsod Member Bryan Alcid iti steering committee ti TODA.
Segun ken ni Atty. Malicad, awan ti kinapudnona nga inikkatda ti nasao nga opisial kas Chairperson ti Tricycle TODA.
Inbatadna nga inbasarda daytoy iti dati a Chairperson idi 2024 a ni Ms. Angel Lao nga isu pay laeng idi ti mangimatmaton iti nasao a pangopisinaan.
Inlawlawagna a maibasar kadagiti dokumento idi 2024 ket ni Konsehal Rbee Ablan ken Konsehal Jeff Fariñas ti nakaikabil ken awan met dagiti timmaod a problema.
Kunana nga iti baet a ni Konsehal Alcid ti Chairman ti Committee on Transportation ket awan ti pakainaiganna iti pannakapili ti agbalin a Chairperson ti steering committee para iti Pamulinawen Festival.
Innayonna nga awan ti maris pulitikana ti agdama a mapaspasamak a situasion.
