LAOAG CITY – Inrakurak ni lead defense counsel Atty. Nicholas Kaufman a saanen a nakigtot ti nagbalin a desision ti International Criminal Court a pagtalinaeden ti hurisdiksion daytoy iti kaso ni dati a Presidente Rodrigo Duterte mainaig iti crimes against humanity.
Inbatadna a saanen a masdaaw ti desision ti Appeals Chamber nga inbasura ti amin nga uppat a ground ti apela ti depensa.
Kunana nga immunan a binallaaganna ti dati a Presidente a saan unay a mangnamnama ti agbalin a resulta iti kasona.
Inpetteng ti abugado, adda iti “existential crisis” ti International Criminal Court gapu kadagiti pannubok kas ti posible a pannusa manipud iti Estados Unidos ken kontrobersial a sangsangoen ti Chief Prosecutor-da.
Gapu iti daytoy, kunana a saanen a mangnamnama a basta laengen a paruk-atan ti korte ti kaso.
Iti baet ti pannakaabak iti jurisdiction challenge, nagtalinaed a positibo ti depensa ken mangnammnama latta a mabalin nga ibasura ti kaso iti Pre-Trial Chamber.
Manamnama a mangiparuk-at ti desision ti International Criminal Court sakbay ti Abril 28 no ituloy iti panangtingiting ti tallo a counts ti crimes against humanity kontra ken ni Duterte.
