LAOAG CITY – Nangiruar ti opinyon ni dati a Commission on Elections Commissioner Atty. Rowena Guanzon mainaig iti manarimaan nga imbestigasion ti Departmet of Justice (DOJ) iti panangidaulo ni Justice Secretary Jesus Crispin Remulla maipanggep iti kaso dagiti mapukpukaw a mammallot.
Inbatad ni Guanzon a saan a patas ken saan a nainkalintegan nga ibaga ni Remulla a maysa a ‘criminal syndicate’ ti grupo ti nalatak a business tycoon a ni Mr. Charlie Atong Ang a saan pay a narugian ti preliminary investigastion iti nasao a kaso.
Inlawlawagna a nasken a ti maysa a Secretary of Justice ket ‘above politics’ patas ken rumbeng a sumursurot iti ‘due process’ a maiyallubog iti linteg batas kas isuna ti maudi nga agpirma iti maiparuk-at a resolusion iti kaso nga aggapu iti piskalya.
Kunana a makapadanag dagiti maar-aramid a developments iti kaso nangruna iti paset ti panangipataw ti kaso a murder iti grupo da Ang pakairamanan dagiti sumagmamano a personalidad kas ti aktres a ni Gretchen Barretto.
Innayonna a nakabutbuteng a panunuten a saan pay a nangrugi ti kaso ket napatawanen kas guilty dagiti respondents nga awan ti naiwayat a panagdengngeg ken saan man laeng a dimmalan iti due process.
Kabayatanna, inpetteng ti dati a Commissioner a nasken nga adalen a naimbag ti Department of Justice ti pannakatratar ti kaso ken rugian pay laeng ti imbestigasion sakbay a mangiyetnag ti desision kontra kadagiti respodnents iti nasao a kaso.
