LAOAG CITY – Manamnama ti possible a pannakaiyuswat ti referendum idiay Australia para iti panagikay ti nasao a pagilyan manipod iti panagbalin na a miembro ti Commonwealth realms.
Daytoy ti report ni Bombo International News Correspondent (BINC) Denmark Suede iti Australia.
Inlawlawag ni Suede nga immunan a naiyuswat ti referendum idiay Australia idi 1999.
Segun kenkuana, 54 a porsiento ti pimmabor nga agtalinaed a commonwealth ti Australia idinto nga 45 a porsiento dagiti saan a pimmabor.
Immun-una iti daytoy, inrakurak ni King Charles III a nawaya dagiti pagilyan a miembro iti commonwealth a makisina no daytoy ti pangngeddeng da.
Mainaig iti daytoy, inpakaammo ni Suede a gapu ta pimmusayen ni Queen Elizabeth II ket mabaliwan amin ti kwarta da ken uray dagiti pasaporte ken barko ti nasao a pagilyan gapu ta ladawan ti pimmusay a reyna ti nakaikabil no sadinno a masukatan iti ladawan ti baro nga ari ti United Kingdom a ni King Charles III.
