LAOAG CITY – Naragsak nga inpakaammo ni Ms. Ryan Rollaine Simon, mangidadaulo ti Municipal Disaster Risk Reduction and Management Office iti ili ti San Nicolas nga awan dagiti seryoso a napasamak kabayatan ti pannakaobserbar ti Semana Santa.
Segun kenkuana, adda ti dua a vehicular incident ti nirespondeanda pakairamanan ti napasamak a rubbish fire iti Barangay 17 ken forest fire iti Barangay 23 iti ili ti San Nicolas.
Inbatadna a saanda nga inpagarup nga agbalin a dupudop dagiti tattao a nagturong kadagiti simbaan ita nga Holy Week kangrunaanna kadagiti nagturong para iti Visita Iglesia gapu iti krisis ti langis.
Inlawlawagna a binalakanda dagiti umili a napan kadagiti coastal areas a saan nga umin-inum ken siputan a naimbag dagiti ubbing a kaduada tapno maliklikan ti saan a napintas a mapasamak.
Kunana nga adda pay ti intedda nga emergency contact numbers kadagiti kangrunaan a lugar a nagturongan dagiti umili tapno insigida a maipaay ti serbisio publiko inkaso nga adda ti insidente.
