LAOAG CITY – Awan ti klase dagiti amin a pampubliko ken pribado a pagadalan iti intero nga Estados Unidos iti pannakaisayangkat ti inagurasion ni United States President-elect Donald Trump iti US Capitol Washington, DC.
Segun ken ni Bombo International News Correspondent Rey Dacul manipud idiay Washington DC, USA, daytoy ket tapno maikkan ti gundaway ti amin a maimatangan ti pormal a panagtugaw ni Trump kas maika-47 a Presidente iti Estados Unidos.
Inbatadna nga adda dagiti kangrunaan a kalsada ti mapaserraan para iti pannakaisayangkat ti victory parade ni Trump.
Inlawlawagna nga agbalin a naiget dagiti otoridad iti panagbantay iti aglawlaw ti lugar tapno maipasigurado met laeng nga awan ti dakes a mapasamak kabayatan ti parada ken inagurasion.
Innayonna a mangnamnama isuna nga ad-adu pay a benepisio ti maipaay kadakuada a mangisursuro idiay Estados Unidos iti babaen ti administrasion ni Trump.
