LAOAG CITY – Inbatad ni Presidente Ferdinand “Bongbong” Marcos Jr. a bayat nga isuna ti adda iti administrasyon ket awan ti maipatungpal a lockdown.
Kuna na a masapol a mabalanse ti sitwasyon ti salun-at dagiti Pilipino ken ti ekonomiya.
Inbatad na a tapno ad-adda a magun-od daytoy ket masapol nga agtultuloy ti booster vaccine rollout.
Inlaw-lawag na a nu adda ti nangato a bilang dagiti mabukunaan iti baet a ngumato ti kaso ket basbassit ti kaso dagiti matay.
Kabayatanna, kuna ni Marcos a kageddan ti saanen a pannakaipatungpal ti lockdown ket agtalinaed ti alert level system ditoy pagilian.
Inbatad na a ti klasipikasyon iti nagduduma a lugar ket maibasar iti sitwasyon ti covid-19.
Mainaig iti daytoy, inpakaammo ni Marcos a plano ti administrasyon na a magestablisar ti Center for Disease Control ken vaccine institute.
Kuna na a karaman ditoy ti pannakaipatakder ti ad-ado nga health center ken hospitals iti intero a pagilian kangrunaan kadagiti nasulinek a lugar.
Innayun na nga iti agdama ket addan ti pannakaikoordinar kadagiti nagduduma a nasyon para iti panagangkat ti nalalaka nga agas a mausar ditoy pagilian agsipod ta agkurkurang ti suplay iti Pilipinas.
