LAOAG CITY – Inbatad ni Mrs. Vilma Eda, ti mangidadaulo ti Schools Division of Laoag a silulukat da nga agbalin a vaccination facilities dagiti pagadalan.
Daytoy ket kalpasan ti naiget a kampanya ti gobierno probinsyal iti Confidence Building iti panagbakuna kontra iti covid-19 ditoy probinsya.
Segun kenni Eda, awan ti problema no mausar dagiti pagadalan no laketdi adda ti proper guidelines nga iparuk-at dagiti maseknan nga ahensya kas iti DOH ken makikoordenar iti DepEd, LGU kasta pay iti DILG.
Mainaig iti daytoy, kuna ni Eda nga ur-urayen da laengen ti direktiba manipud kadagiti maseknan nga ahensya pakaseknan iti panagbakuna ditoy probinsya.
Maipalagip a dagiti mangisursuro ket maikanem iti listaan ti DOH a maiprayoridad a mabakunaan.
