LAOAG CITY – Nagballigi dagiti kameng ti Provincial Drug Enforcement Agency (PDEU) ken PNP-Laoag a nangtiliw iti maysa a babai iti drug buy-bust operation iti Barangay 3 partikular iti Marcos Stadium ditoy ciudad ti Laoag pasado alas-diyes idi rabii.
Nabigbig ti subject ti operasyon a ni Ritchelle Keith Lorenzo alyas Shakira, agtawen ti 27, addaan ti live-in partner, maibilang kas provincial level drug watch list ti PDEU, taga Barangay 17, Dupittac iti ili ti Piddig ngem agdama nga agnanaed iti Barangay 15 ditoy ciudad ti Laoag.
Segun ken ni Police Chief Master Sergeant Harold Nicolas, ti mangidadaulo ti PDEU, tiniliw da a dagus ni Lorenzo kalpasan a naglako ti maysa a sachet a naglaon ti maipagarop a shabu nga agbalor ti sangaribo a pisos iti maysa a nagpammarang a poseur buyer.
Kuna na nga iti panangukag da ti bag ni Lorenzo ket nakakumpiskar da pay ti innem a dadakkel a sachet a maipagarop a naglaon ti shabu.
Inbatad ni Nicolas a nabayagen a sipsiputan da ni Lorenzo gapu iti maipagarop nga illegal nga aktibidad na.
Innayon na a sakbay pay ti lockdown gapu iti covid-19 ket rimuaren ti nagan ni Lorenzo iti drug watchlist da ngem saan da a naikkan ti gundaway a nangisayangkat ti operasyon.
Inpakaammo ni Nicolas a nalawa ti masakupan ti operasyon ni Lorenzo ditoy probinsya partikular ditoy ciudad ti Laoag, ili ti San Nicolas ken Piddig.
Immun-una iti daytoy, kuna ni Nicolas a maisayangkat koma ti transaksyon iti Barangay 14 wenno 16 ditoy ciudad ngem napan ti subject iti Marcos Stadium nga isu ti nakatiliwan na.
Nagkedked metten ni Lorenzo a nagpainterview iti Bombo Radyo Laoag ngem inadmitir na nga agus-usar ti illegal a droga.
Naobserbaran met ti Bombo Radyo nga arigna awan ti aniaman na ken ni Lorenzo iti pannakatiliw na.
Manamnama a maipila a dagus ti reklamo kontra ken ni Lorenzo.
