LAOAG CITY – Maysa a babai idiay California, U.S.A. ti akin-iggem ti Guinness World Record para iti kaatiddugan a dila iti intero a lubong ken pinaneknekanna a saan laeng daytoy a pang-display.
Ni Chanel Tapper, agtawen ti 34, ti akinkukua ti dila nga adda ti rukudna a 3.8 a pulgada.
Gapu iti daytoy, masansan a makapaspasar isuna ti nakaro a reaksion manipud kadagiti tattao manipud iti simple a pannakakigtot agingga iti panagpukkawda gapu iti buteng.
Malaksid iti panagbalin a record-holder, inusar ni Tapper ti naidumduma nga abilidadna para iti nakaragragsak a trick.
Kabaelanna nga ikkaten dagiti bloke ti playing blocks a Jenga, i-flip dagiti plastic cups ken agbalanse ti kutsara usar laeng ti dilana.
Gapu iti naisangsangayan a talentona, naikkan daytoy ti oportunidad a rummuar kadagiti nagduduma a proyekto pakairamanan ti maysa a advertising campaign para iti maysa a nalatak nga Italian fashion brand.
