LAOAG CITY – Nagsinnapgud ti dua a motorsiklo iti national highway iti Barangay 23, Sta. Cecilia iti ili ti San Nicolas.
Ti nangiturong ti Yamaha Mio ket agtawen ti 66, lalaki, addaan ti Professional Driver’s License ken residente ti Barangay Baresbes iti ili ti Dingras idinto a ti driver ti maysa pay a motorsiklo a Yamaha Mio ket agtawen ti 26, lalaki, addaan ti Non-Professional Driver’s License ken residente ti Barangay 11 Sta. Rosa iti ili ti Sarrat.
Basar iti San Nicolas Municipal Police Station, kabayatan a dumaldalyasat ti Yamaha Mio nga agturong nga agpa-daya ket nasapgudna ti maysa met laeng a motorsiklo nga agturong iti kapada a direksion.
Gapu iti daytoy, naipurwak ti natataengan a driver ti motorsiklo ken naidungpar ti luganna iti Gmelina tree a masarakan iti abagatan a paset ti kalsada.
Agpada a nagsagaba ti sugat iti nagduduma a paset ti bagi dagiti dua a nakamotorsiklo a naitaray dagitoy iti Governor Roque Ablan Sr. Memorial Hospital para iti pannakaagasda.
Naammoan nga agpada a nakasuot dagiti dua a driver ti protective helmets ken high visibility vests idi napasamak ti disgrasia.
