LAOAG CITY – Balligi ti pannakairubuat ti Bagong Bayaning Magsasaka Rice babaen iti Kadiwa ng Pangulo iti National Irrigation Administration – Ilocos Norte Irrigation Management Office Compound iti ili ti San Nicolas.
Daytoy ket kageddan ti pannakaselebrar iti maika-67 a panagkasangay ni Pres. Ferdinand Bongbong Marcos Jr. ita nga aldaw, Setiembre 13.
Naammoan a dagiti kangrunaan a mabenepisiaran iti pannakailako ti nalaka a bagas ket dagiti adda iti vulnerable sector kas kadagiti miembro ti Pantawid Pamilyang Pilipino Program wenno 4P’s, single parent, Persons With Disability ken senior citizens.
Mailako ti bagas iti 29 iti kada kilo no sadinno nga agingga laeng iti 10 a kilo ti bagas ti mabalin a gatangen dagiti benepisiario tapno maiwaras ti nasao a programa.
Mainaig iti daytoy, inbatad ni Ms. Mary Joy Rungduen a residente ti Brgy. Bungon iti siudad ti Batac a dakkel a tulong daytoy kadakuada nangruna ket nangina ti bagas iti agdama.
Kunana a gapu iti kinarigat ti panagbiag ket masapolda ti nalaklaka a bagas isu a ginundawayanda ti programa apaman a naammoanda daytoy.
Kabayatanna, naggapu dagiti sangaribu a sako a bagas iti Brgy. San Marcelino iti ili ti Dingras no sadinno a sag-sangapulo a kilo a bagas ti mailako kadagiti maseknan a benepisiario.
