LAOAG CITY – Inpakaammo ni Mr. Arvin Lumang, ti mangidadaulo ti City Disaster Risk Reduction and Management Office nga umabot iti nasurok-kumurang a 20 a milyon a pisos ti balor ti perdisyon iti benneg ti agrikultura ken imprastraktura iti Siudad ti Batac.
Segun kenni Lumang, adda ti 17.5 a milyon a pisos iti agrikultura idinto nga adda met ti 2 milyon a pisos ti nadadael iti imprastraktura.
Inbatadna nga iti benneg ti agrikultura ket kaadduan kadagiti nadalapos ti Bagyo ket ti mula a pagay dagiti mannalon idinto nga iti imprastraktura ket ti naregreg a project wall iti paset ti Rayuray Road.
Mainaig iti daytoy, kunana nga adda ti 14 a Barangay iti Siudad ti Batac ti partially ken totally nga awan ti serbisio ti kuryente da kas ti Brgy. Naguirangan, Baoa East, Dariwdiw, Bungon, Colo, Rayuray, Ricarte Sitio Jappa, San Pedro, Capacoan, Palongpong, Sumader, San Mateo, Mabaleng ken Brgy. Tabug Sitio Sideg.
Inlawlawag na nga adda ti 73 a pamilya wenno 288 nga indibidual manipod iti 7 a Barangay iti Siudad ti Batac ti nai-report iti opisinada a nalayos ngem saan daa nagpaibakwit kas ti Brgy. Ablan, Cal-laguip, Ricarte, Cangrunaan, Nagbacalan, Baay ken Caunayan.
Innayonna nga iti agdama ket mapan da manen agsursur kadagiti maseknan a Barangay tapno maammoan ti kasasaad dagiti residente ken situasion iti lugar da.
Kabayatanna, nakasagana metten dagiti relief goods a maipaay kadagiti residente nga ad-adda a naapektaran ti isasaplit ti Bagyo Neneng.
