LAOAG CITY – Binigbigen ti pamilya ti bangkay ti maysa a lalaki a nabirukan nga agtatapaw iti Bislak river a sakupen ti Barangay 15, San Roque I iti ili ti Bacarra.
Daytoy ti inpakaammu ni P/Lt.Col. Roldan Suitos, Chief of Police iti ili ti Bacarra kabayatan ti agtultuloy a nga imbestigasyon.
Nabigbig ti biktima nga agtawen ti 45, taga-Margaay, Vintar ngem agnanaed iti ti ciudad ti Laoag.
Naudi a nakita ti biktima uppat nga aldawen ti napalabas. ken saan met nga inrep-report ti pamilya na daytoy gapu ta inpagarupda a napan laeng nagpasyar ti biktima ken masansan a kastoy ti araramiden na.
Segun ken P/Lt.Col. Suitos saan a masinunuo no adda kadwa ti biktima apaman a napasamak ti insidente gapu ta saanna met nga inusar ti motor na.
Inpakaammu pay ti kameng ti pamilya ti biktima masansan nga agin-inom daytoy iti nasanger.
Kabayatanna saan pay a makapagdesisyon ti pamilya ti biktima nu ipadalanda iti autopsy ti bangkay ti biktima.
Maipalagip nga idi laeng Dominggo ket nabirukan ti maysa a mangalap ti agtatapaw a bangkay ti lalaki iti Bislak River iti Brgy. 15, San Roque I iti ili ti Bacarra.
