LAOAG CITY – Awan ti nakita a foul play iti pannakatay ti maysa a lalaki iti Barangay Poblacion 4 iti ili ti Pasuquin.
Segun ken ni Police Major Suerte Obongen, ti chief of police iti ili ti Pasuquin, ti biktima ket agtawen ti 51 ken residente iti nadakamat a barangay.
Inbatad na a nakaawat da ti tawag manipud iti maysa a concerned citizen mainaig ti nabirukan a bangkay ti maysa a lalaki iti uneg ti maysa a kwarto iti balay ti pamilya Labuguen.
Inlawlawag na nga iti imbestigasyon da ket agmaymaysan nga agnanaed iti balay da ti biktima gapu ta ti balasang na ket agnanaed iti ili ti San Nicolas.
Inpakaammo na a mapan koma bisitaen ti anak ti ama na ngem ditoyen a naduktalan na a maysan a nalamiis a bangkay.
Segun iti anak ti biktima, agsagsagaba ti kidney failure ti ama na.
