LAOAG CITY – Patien ni Barangay Captain Florendo Corpuz iti Barangay 14 iti ili ti San Nicolas a saan a narespetar isuna kas ama ti barangay da kalpasan a saan a naideretso iti Barangay Hall da dagiti relief goods manipud iti Dept. of Social Welfare and Development.
Segun kenni Corpuz, nasakit ti rikna na gapo ta saan man laeng a dimmalan kenkuana kas kapitanno diket naideretso iti pagtaengan ni Barangay Kagawad Brian Casabay.
Naamoan a ni Casabay ket agpaidasig kas kapitan ken rumrumuar a ti kakadua na a nagibunong ket dagiti ka-line up na iti umay nga eleksyon.
Inpetteng na a nasaysayaat kuma a naipan iti Barangay Hall ken nakita na ken dagus a napan innala dagiti kakadua na a barangay officials para iti panagibunong dagitoy.
Inpalgak na nga isuna pay laeng ti kapitan iti barangay da ngem saan nga isuna ti nangawat kadagitoy ken nasken kuma a ti nagibunong ket dagiti mismo nga opisyal ti lugar da.
Mainaig iti daytoy, nagturong met ti grupo ti Bombo Radyo Laoag ngem nasapa a rimuar ti barangay kagawad.
Kabayatanna, inbatad me ni Election Officer Wilson Balbas iti nasao nga ili a no kastoy ti sitwasyon ket mabalin nga agtennag kas premature campaigning.
