LAOAG CITY – Inbatad ni P/Cpt Randy Damo, Chief of Police iti Philippine National Police iti ili Solsona a maysa a barangay kagawad ti maitudtudo a suspek iti napasamak a pammaltog iti Brgy. Manalpac iti ili ti Solsona.
Bnabigbig ti biktima a ni Benmar Cudal, agatwen ti 36, awanan trabaho, addaan ti live in partner, Drug Surrenderee ken ti suspek ket ni Brgy. Kagawad Jogie Benito, adda iti umno a tawen, naasawaan ken agapada a residente iti nadakamat a lugar.
Segun ken ni Damo binibig ti biktima ni Benito nga isu ti nangpaltog kenkuana babaen iti ante mortem wenno dying declaration.
Mainaig iti daytoy, natiliw ni Brgy. Kagawad Benito iti uneg mismo ti pagtaenggana.
Basar iti inisial nga imbestigasion nga inwayat ti Philippine National Police iti ili ti Solsona bayat a nakatugaw ti biktima iti veranda iti sango ti pagtaenganda ket kellaat a pinalto-paltogan ti suspek iti nagduduma a paset ti bagi ti biktima.
Nupay kasta, awan pay ti narekobre dagiti otoridad ti nausar a paltog ti suspek.
Innayonna a mamapati nga adda ti dati a susik ti suspek ken biktima gapu iti maipagarup nga utang.
Kabayatanna, dimmalan ti suspek iti Paraffin test nga inwayat ti Ilocos Norte Provincial Crime Laboratory Office ken manamnama a mapilaan ti kaso a Frustrated Murder ti suspek iti pammaltog.
Iti agdama, mangiwayat ti Philippine National Police iti ili ti Solsona iti naun-uneg pay nga imbestigasion iti nadakamat nga insidente.
