LAOAG CITY – Nagsinnungbat iti online ti Barangay Secretary ken maysa a residente iti Brgy. 22, San Cristobal iti ili ti Sarrat maipanggep iti Ayuda para sa Kapos ang Kita Program wenno AKAP Program.
Segun ken ni Barangay Secretary JD Gaoaten iti nasao a barangay, nangrugi ti saanda a panagkikinnaawatan kalpasan a nabasana ti post iti online ni Mr. Junjun Mauricio kontra iti panangipatungpalda ti Ayuda para sa Kapos ang Kita Program rason a nagkomento isuna.
Inbatadna a sinaludsodna ken ni Mauricio no nakaawat met laeng ti kabsatna a maysa kadagiti kangrunaan a benepisiario iti sitio iti barangayda.
Inlawlawagna a dagiti maseknan a sektor Kagawad ti mismo a nangpili kadagiti residente a nairaman iti listaan ngem matingiting pay dagitoy babaen iti ahensia ti gobierno.
Inpasingkedna nga awan ti maul-ulit a benepisiario iti Ayuda para sa Kapos ang Kita Program iti barangayda tapno agbalin a sapasap amin a mabenepisiaran dagitoy.
Kunana nga awan ti asawa ti Barangay Health Workers a nairaman a nabenepisiaran iti nasao a programa.
Mainaig iti daytoy, inpakaammo ti Barangay Secretary nga adda ti 565 a pamilia iti Brgy. 22, San Cristobal isu a ti ar-aramidenda a wagas tapno maiwaras ti ayuda manipud iti gobierno ket maysa a benepisiario iti tunggal pamilia.
Naammoan nga adda ti 32 a benepisiario a residente iti nadakamat a barangay ti nakaawat ti Ayuda para sa Kapos ang Kita Program.
Innayonna nga adda ti maiyuswat a General Assembly iti Brgy. 22, San Cristobal inton Oktubre 20 iti oras ti alas tres ti malem tapno mapagsasaritaan a naimbag dagiti arungaing dagiti kabarangayanda.
Kabayatanna, inpadanon metten ti Barangay Secretary ken ni Barangay Chairman Banuar Malaqui maipanggep iti nasao a banag.
