LAOAG CITY – Maysa a barbero idiay Lagos, Nigeria ti nakagun-od ti world record gapu iti kinapaspasna iti skin fade haircut kadagiti lima a tattao.
Kinumpirmaran ti records keeping organization a Guinness World Records a ti agtawen iti 26 a ni Owoyemi Qudus Adebayo ti baro a record holder ti titulo a “fastest time to complete five skin fade haircuts.”
Daytoy ket kalpasan a napukisanna ti buok dagiti lima a tattao iti uneg ti 14 minutes and 56 seconds.
Naiyuswat ti record attempt ni Adebayo iti campus grounds ti University of Llorin no sadinno a ditoy isuna nga agad-adal ti statistics.
Kabayatan a maisaysayangkat ti record attempt, adda iti audience dagiti kaklase ni Adebayo pakairamanan dagiti sumagmamano nga opisial ti unibersidad.
Basar iti vice chancellor ti unibersidad a ni Wahab Egbewole, sobra ti kina-proud daytoy ken ni Adebayo saan a gapu laeng iti Guinness World Record daytoy no di ket gapu metten iti kinaanusna a working student a kinabaleanna ti narigat a course daytoy iti statistics ken panagbalin a barbero.
