LAOAG CITY – Indatag ti Department of Education ti baro a learning programs para kadagiti pagadalan a naapektaran kadagiti didigra.
Daytoy ket ti Dynamic Learning Program (DLP) a gagem a masolbar ti pannakaitantan kadagiti klase gubuay kadagiti sumangbay a didigra.
Rugian ti pilot implementation ti programa ita a Nobiembre kadagiti pagadalan a naapektaran ti bagyo iti Ilocos Region, Cagayan Valley, Central Luzon, Calabarzon, Bicol Region ken Cordillera Administrative Region.
Iti babaen ti nasao nga inisyatiba, mabalin a mangisayangkat ti make-up classes dagiti naapektaran a pagadalan ken usaren ti Dynamic Learning Program activity sheets a simple laeng, targeted ken adaptable iti temporary learning spaces.
Mabalin pay mangiyuswat ti parallel classes, activity-based engagement, student portfolios ken reduced homework policy.
Magutgutigot dagiti agad-adal nga adalen a naimbag dagiti lessons ken asaen dagiti essential skills kas ti panagsurat, problem-solving ken critical thinking.
Inaramid ti Department of Education ti nasao nga inisyatiba kageddan ti sumagmamano a lawas a pannakasuspenso dagiti klase kadagiti nagduduma a paset ti pagilian gapu kadagiti nagsasaruno a bagyo.
