LAOAG CITY – Inaprubaran ti United Nations General Assembly ti maysa a baro a world map a mangipakpakita ti umno a sukat dagiti kontinente, no sadinno ket dakdakkel ti Africa kumparar iti dati a representatsionna daytoy.
Iti 164 a pimmabor, maysa a pagilian ti kimmontra ken innem ti nagkedked nga agbotos. Bimmotos ti Estados Unidos a kontra iti resolusion.
Innalukoy ti United Nations dagiti miembro a pagilian nga usaren ti Equal Earth cartographic projection kas alternatibo iti tradisional a Mercator projection nga araramaten manipud pay laeng idi tawen 1596.
Iti nasao a Mercator map, dimmakel ti representsion dagiti lugar nga asideg iti North ken South Poles bayat a bimmassit met dagiti rehiyon nga adda iti asideg ti equator.
Gapu iti daytoy, rumrumuar a dakdakkel ti Europa ken North America kumparar iti umno a sukatda.
Kabayatanna, mainaig iti daytoy, inanunsio ti France a co-sponsor ti nasao a resolusion nga isardengdan ti panagusarda ti Mercator projection.
Ti inisiatiba ti France ket naiwayat bayat a patpatibkeren ti France ti relasionda kadagiti African countries, partikular kadagiti dati a kolonyana.
