LAOAG CITY – Natay ti maysa a lalaki kalpasan ti pannakadesgrasya na iti ili ti Pagudpud.
Segun kenni Patrolman Efren Pascua iti PNP-Pagudpud, ti biktima ket agtawen ti 27, awanan asawa ken residente ti Brgy. Burayoc iti ili ti Pagudpud.
Segun kenni Pascua, bayat nga agpa-Amianan ti biktima ket naidungpar ti motorsiklo na iti sementado a poste ti kuryente iti met laeng iti nasao a Barangay.
Inbatad na nga agawid kuman ti biktima manipod iti pagtrabahoan na ngem mapapati a dimmagas daytoy iti balay ti pagayam na ken naggi-inom dagitoy.
Inlawlawag na a naitupar ti ulo ti biktima iti poste a posible a rason metten ti pannakatay na nangruna ket saan a nakasuot ti helmet idi napasamak ti desgrasya.
Kunana a sakbay a naidungpar iti poste ti kuryente ti biktima ket ummunan a naidungpar iti puon ti mahogany.
Innayon na a naitaray iti Bangui District Hospital ti biktima ngem naideklara met laeng daytoy a Dead On Arrival.
