LAOAG CITY – Naipasigurado iti baro nga impeachment proceedings kontra ken ni Vice President Sara Duterte ket adda ti baro nga ebidensya kadagiti alegasyon a saan pay a nasungbatan.
Daytoy ti inbatad da Akbayan party-list Rep. Perci Cendaña ken ACT Teachers party-list Rep. Antonio Tinio kalpasan ti nagbalin a karit da House Committee on Justice chairperson Batangas Rep. Gerville Luistro ken ti National Unity Party a kasapulan a makaipaay ti baro nga ebidensya kontra iti baro nga impeachment complaint kontra iti bise presidente.
Inrakurak ni Tinio a mamati da a no rugyan ti Justice Committee ti mangisayangkat ti panagdengngeg ket awan ti agbalin a problema iti agdama nga isyu ti Sufficiency in form ken substance.
Immunan nga inpetteng ti National Unity Party a saan da a suportaran ti baro nga impeachment complaint kontra iti bise presidente no awan ti maipresentar wenno maipakita a baro nga ebidensya.
