LAOAG CITY – Inpannakkel ni Mr. David Hiroshi Quitevis, ti Coach iti Secondary Basketball iti Ilocos Sur a naiget a nakasagana dagiti amin nga atleta manipod iti nasao a probinsia.
Daytoy ket kagiddan ti pormal a pananglukat ti Region 1 Athletic Association Meet a maiyuswat ditoy Ilocos Norte kas host iti nadakamat nga aktibidad.
Segun ken ni Mr. Quitevis, sumagmamano nga aldaw sakbay a nadanon daytoy pormal a panangrugi ti naindaklan a paay-ayam ket nagturongdan ditoy probinsia kangrunaanna iti ili ti Pasuquin nga isu ti temporario a pagtarusanda kabayatan ti pannakaisayangkat ti Region 1 Athletic Association Meet.
Inbatadna a napintas ken nabara ti panangpasangbay ti probinsia kadakuada apaman a simmangpetda ditoy probinsia babaen ti nasayaat a panangbayabay ken panangakomodar kadakuada kadagiti sports venues.
Inlawlawagna a doble ti inaramidda a panagsagana tapno sigurado a magun-odda ti balligi kadagiti nagduduma nga sports competition babaen ti panangisayangkatda ti intensive training kadagiti maseknan nga atleta.
Kunana nga agarup amin nga sports events ket nakipasetan dagiti umaayam manipod iti Ilocos Sur a magagaran ti panangipakitada dagiti nasursuroda kabayatan ti panagsanay dagitoy.
Innayonna nga inaramidda amin ti kabaelanda tapno maiyawid ti kampeonato ita a tawen 2024.
