LAOAG CITY – Inpeksa ni Mr. Marlon Daquioag, Basketball Coach ti Team Laoag ti sakit ti nakemna kadagiti officiating officials ti Basketball Governor’s Cup iti napasamak a panagkabil dagiti umaayam manipud iti Team Laoag ken Team Dingras.
Segun kenkuana, namunganay ti insidente kabayatan ti maikatlo a kuarter ti ay-ayam ket apaman a nag-in bound ti player number 4 manipud iti Team Laoag ket adda ti nangiduron kenkuana a manipud met iti Team Dingras.
Inbatadna a ditoy a nangrugin ti saan a panagkikinnaawatan dagiti dua a grupo agingga a nagbinnara ken nagkakabil dagiti sumagmamano a miembro kadagitoy.
Inpettengna a nasken koma a dagus a naganawa dagiti officiating officials iti panagriri iti nagbaetan dagiti dua a grupo tapno saanen a kimmaro pay ti insidente.
Kabayatanna, kinumpirmaran ni Atty. Charito Malicad, mangidadaulo ti Communications and Media Office ditoy siudad ti Laoag nga adda dagiti maseknan nga umaayam ti Team Dingras ti nadiskualipikar.
