LAOAG CITY – Nailungalong iti Kamara de Representantes ti gakat iti pannakaisukat ti bagas kadagiti basura a maurnong wenno mapidot.
Iti House Bill 7781 wenno “Walang Plastikan, Palit Bigas Act” nga inlungalong ni Pampanga Rep. Carmelo Lazatin Jr., gagem daytoy a masolbar ti kumarkaro a problema kadagiti basura nangruna kadagiti plastik.
Malaksid iti daytoy, karaman pay dagiti basura nga agruprupsa ken dagiti nakaselsel kadagiti waterways a pangta a saan laeng para iti aglawlaw no diket iti salun-at pay.
Basar iti What a Waste Global Database ti World Bank idi 2025, umabot iti 11.2 bilyon a tonelada ti solid waste ti makolkolektar iti intero a lubong ngem ad-adu latta ti saan a makolkolektar.
Mainaig iti daytoy, iti Pilipinas, adda ti 14.6 milyon a tonelada ti municipal solid waste.
Maibasar iti datos manipud iti 2025 World Bank What a Waste Global Database ken iti kapada a report, Pilipinas ti maika-27 iti 50 a pagilian maipapan iti waste generation.
Gapu iti daytoy, inpaganetget ti Kongresista, ad-adda pay a papigsaen ti Republic Act No. 9003 wenno Ecological Solid Waste Management Act ken maaddaan ti budget para iti panaggatang ti bagas iti kada isukatda a basura aglalo kadagiti plastik.
Ti nasao a programa ket ipatpatungpalen idiay Angeles, City, Pampanga; Magallanes Cavite; San Jacinto, Masbate; Barangay Dalupaon, Pasaco, Camarines Sur, Pagbilao Quezon; Tarlac ken Bolinao Pangasinan.
Saan met a dinakamat ti agpanpanday linteg no mano a kilo ti bagas ti kasukat iti kada kilo ti plastik nga isukat dagiti umili.
