LAOAG CITY – Naiget a naglikudan ni Senate President Vicente ”Tito” Sotto III ti inrakurak ni dati a presidential legal counsel Atty. Salvador Panelo a maipagarup nga adda ti sumagmamano a senador a nakadesisionen kontra iti impeachmet trial ni Vice President Sara Duterte.
Segun ken ni Sotto, agtalinaed a patas ken awan kankanunongan ti Senado iti panagdengngeg ken ur-urayenda dagiti ebidensia a maidatag ti impeachment proceedings.
Daytoy ket kalpasan nga immunan nga inbatad ni Panelo nga isuda Sotto, Senador Panfilo Lacson, Senador Risa Hontiveros ken Senator Francis Pangilinan ket adda ti desisiondan ti butos iti impeachment trial ti Bise Presidente.
Malaksid iti daytoy, agsagsagana ti Senado ti posible a pannakaiyakar ti Articles of Impechment manipud iti Kamara de Representatantes.
Inbatad pay ni Sotto nga adda pay informal dinner meeting-da kaduana dagiti sumagmamano a miymbro ti majority bloc tapno pagsasaritaan ti manamnama a legal ken political proceedings ngem inlawlawagna a saan daytoy nga opisial a caucus.
Kinunana ti Senador nga iti agdama ireb-review-na dagiti legal process kas panagsaganana ti papelna kas presiding officer ti impeachment court.
Kabayatanna, sumangsango ni Vice President Sara kadagiti reklamo a betrayal of public trusts ken ti maipagarup a saan nga umiso a panagusar ti confidential funds.
Maipalagip nga inbilin ti Commission on Audit (COA) ti Office of the Vice President ti pannakaisubli ti agarup P448.2 million a confidential funds a nakwestionaran gapu iti saan nga umiso a panagusar karaman ditoyen dagiti cash advance ken nagduduma pay a nagastos idi 2023 no sadinno nga adda ti nayon a P300 million nga immunan a naideklarar a disallowed finality.
