LAOAG CITY – Agtultuloy pay laeng ti imbestigasyon ti BFP-Pasuquin ti pannaka-uram ti sumagmamano a paset ti Barangay Hall iti Barangay Poblacion 1 iti ili ti Pasuquin.
Segun kenni Senior Fire Officer III Keith Howell Cuepo, Fire Marshall ti BFP iti nasao nga ili, partikular a nauram ket ti receiving area iti ummuna a kadsaaran ken ti SK office nga adda iti maikadua a kadsaaran ket awan met ti nakita da pay a nauram.
Iti inisyal nga imbestigasyon, mapatta-patta a nasurok maysa a milyon a pisos ti balor dagiti nadadael ken inbasar da daytoy iti procedural manual ti BFP.
Inlawlawag na a basar iti manual da, ti pasdek ket Class B ken ti kada per square meter daytoy ket 15 a ribo a pisos ken ti area ket 70 sq meter.
Nupay kasta, kunana a mabalin nga agbaliw daytoy gapo ta agdepeden to iti affidavit ti barangay ken dagiti empleadi ti PSA nga adda iti nasao a lugar.
Naamoan a manarimaan ti panangparehistro ti PSA para iti National ID ken dagitoy ti ummuna a nakakita ti uram.
Mainaig iti daytoy, imbestigaren da a nalaing ti posible a namunganayan ti uram ken saan da a makitkita a nairanta daytoy.
