LAOAG CITY – Pimmusayen ti biktima ti desgrasya bayat a maag-agasan iti Mariano Marcos Memorial Hospital and Medical Center idiay ciudad ti Batac.
Daytoy ti inpakaammo ni Clowie Carnate y Agonoy, agtawen ti 22, awanan ti asawa ken trabaho ken residente iti Brgy. Lanao, iti ili ti Bangui, anak ti biktima a ni Roy Carnate y Nacapuy, agtawen ti 52, naasawaan, awanan ti trabaho ken residente iti nasao a lugar.
Immuna iti daytoy, idi Oktubre 12 bayat nga agpadaya a direksyon ti biktima a nakalugan ti motorsiklo ken idi nakadanon iti paset ti sangwanan ti Iglesia Filipina Independiente Church ken immorvertake iti maysa a motorsiklo.
Gapo iti daytoy, nadungpar na ti nasabat na a maysa pay a motorsiklo nga inturong ni Raphy Jacinto y Aguinaldo, agtawen ti 22, awanan ti asawa, maysa a construction worker ken residente ti ili ti Dumalneg.
Nagsagaba ti sugat dagiti dua a biktima ken naitaray iti ospital ngem ni Carnate ket pimmusay idi Oktubre 13 gapo iti sinagaba a sugat.
Naamoan a ti biktima ket adda iti impluwensya ti nasanger idi napasamak ti insidente.
