LAOAG CITY – Nagtalinaed iti Laoag City General Hospital ti biktima ti pammagkong idiay Sarrat, Ilocos Norte.
Nabigbig daytoy a ni Eddie Aguilar y Jose, agtawen ti 44, addan ti live-in partner, mannalon ken residente ti Brgy 7. iti nasao nga ili idinto a ti suspek ket ni Rodel Guntang y Buena, agtawen ti 40, awanan ti asawa ken residente iti met laeng iti nasao a lugar.
Naamoan a boluntaryo a simmuko ti suspek iti PNP headquarters ditoy ciudad ti Laoag ken nai-turn over iti PNP-Sarrat.
Manamnama ket a mapilaan ti kaso a frustrated murder ken nagtalinaed iti kustudiyar ti PNP-Sarrat.
Maipalagip a ti biktima ken suspek ket naginom da iti pagtaengan ni Jose Edra ket ditoy a timpuar ti nabara a saan da a panagkinnawatan.
Gapo iti daytoy, agawid kuman ti biktima ngem sinaruno ti suspek ket ditoy a binagkong na namindua a daras ti barukong na.
