LAOAG CITY – Nagbalaag ti United States Embassy iti Manila kadagiti American nationals kontra iti pannakikoordinar kadagiti grupo nga insurgent kas ti New People’s Army (NPA) nga armado a sangay ti Communist Party of the Philippines (CPP).
Segun iti embassy, naikonsiderar a foreign terrorist organization ti NPA ti Estados Unidos ken Pilipinas, ket no siasinno man ti makikinnammayet kadagitoy ket maikkan ti pannusa a pannakaarestar wenno pannakapatay.
Naikeddeng met dagiti lugar a narisgo kas dagiti rural ken kabanbantayan a paset ti Leyte, Mindoro, Negros, ken Samar, no sadinno nga adda ti gubat a napasamak iti nagbaetan ti NPA ken Armed Forces of the Philippines.
Kabayatanna, nagballaag met ti embassy nga adda dagiti nagduduma a nongovernmental organizations nga adda pakainaiganda iti NPA ken sabali pay a grupo. Nabalakadan pay dagiti interesado nga ag-volunteer a tapno masigurado ti kinatalged dagitoy ket makikoordinarda laeng kadagiti rehistrado a grupo iti Philippine National Volunteer Service Coordinating Agency ken kadagiti Local Government Unit.
