LAOAG CITY – Umad-adon ti bilang dagiti gumatgatang iti lechon baboy sumagmamano laengen nga oras sakbay ti panangsarabo iti paskua.
Daytoy t inpalgak ni Mr. Rogelio Colobong Sr., ti akinkukua ti maysa a paglechonan iti Brgy. 1 iti ili ti San Nicolas.
Inpalgak ni Colobong a kageddan ti panagado ti bilang dagiti gumatgatang ket isu met ti panagngato ti presyo ti lechon iti sangaribu a pisos.
Inrakurakna nga iti kallabes ket adda ti 2 aginnga 5 nga baboy iti lutlutwenda ngem ita a Disyembre ket umabot iti sumurok-kumurang 15 a baboy a mabalin a magatang manipod iti lima a 5,000 a pisos agingga iti 14,000 a pisos.
Inpettengna nga agtutuloy ti panagawatda ti orders agingga intun Disiembre 30 iti oras ti 4am-9pm ken manamnama a temporaryo a maisardeng ti operasyonda iti mismo bisperas ti baro a tawen.
Kabayatanna, inpalgak na nga gatgatangen da dagiti lechonen da iti ili ti Vintar ken kunana a saan a naapektaran ti negosyo da kasta met ti supply ti baboy uray adda dagiti nagpositibo iti African swine fever iti ili ti San Nicolas gapu ta ti supplier da ket kompleto kadagiti kasapulan a dokumento.
