LAOAG CITY – Agdoble ti bilang dagiti trabahador ti Valdez Flower Shop tunggal madanon ti fiesta dagiti minatay.
Segun ken ni Ms. Joan Cadoy, maysa kadagiti empleado ti nasao a flowershop, masapol ti ad-adu a katinnulunganda gapu ta kadagitoy a panawen ket dupudop dagiti kostumerda a mapan gumatang kadagiti nagduduma a klase ti sabsabong nga ilaklakoda.
Inbatadna a no mabalbalin ket no ania ti kayat wenno birbiroken dagiti kustomer iti puestoda ket maidiayada kadagitoy tapno saanda nga agbirok iti sabali pay.
Inlawlawagna a dagiti kangrunaan a gatgatangen dagiti kustomerda ket dagiti sabsabong a rosas, emporium ken dadduma pay.
Kunana nga adda met dagiti gundaway nga agkurang ti suplay ti sabsabongda ngem sakbay pay a mapasamak daytoy ket sakbayanda babaen iti nasapa a panag-order-da kadagiti ilaklakoda a sabsabong.
Innayonna a ti kanginaan a sabsabong ket ti carnation, stargazer ken dadduma pay ngem nakadepende ti saritaanda kadagiti kostumerda.
