LAOAG CITY – Apagapaman a ngimmato ti bilang dagiti ubbing nga agtrabtrabaho nga agtawen ti 5 agingga 17 idi 2025, basar iti Philippine Statistics Authority (PSA).
Basar iti Philippine Statistics Authority, umabot iti 868,540 ti working children idi 2025, nangatngato maidasig iti 861,450 idi 2024 ngem nababbaba iti 1.09 milyon a nairekord idi 2023.
Katukad daytoy ti 3.1% ti pakabuklan a populasion dagiti ubbing.
Iti pakabuklan a bilang, 61.6% wenno 535,390 ket dagiti lallaki idinto a 38.4% wenno 333,150 ket dagiti babbai.
Kaadoan wenno 73.5% ket agtawen ti 15 agingga 17.
Kaadoan kadagiti ubbing nga agtrabtrabaho ti adda iti sektor ti serbisio (48.7%), sinaruno ti agrikultura (41.2%), ken industria (10.1%).
Kaadoan wenno 69.1% ti working children ket agtrabtrabaho ti 20 nga oras wenno nababbaba iti kada lawas idinto nga 18.4% ti agtrabtrabaho ti 21 agingga 40 nga oras iti kada lawas.
Kabayatanna, umabot iti 513,650 dagiti ubbing a karaman iti child labor idi 2025, nangatngato maidasig iti 509,160 idi 2024 ngem nababbaba iti 678,360 idi 2023 a katukad daytoy ti 1.8% ti amin nga ubbing nga agtawen ti 5 agingga 17.
