LAOAG CITY – Balligi a naisayangkat ti Philippine Navy ken Japanese Maritime Self-Defense Force, ti umuna a bilateral maritime cooperative activity iti West Philippine Sea idi kalman, Agosto 2.
Naamuan a nangipatulod ti Philippine Navy iti multi-role guided missile frigate BRP Jose Rizal bayat nga indeploy ti Japan ti Takanami-class destroyer-na a JS Sazanami para iti daytoy nga aktibidad.
Malaksid iti daytoy, ti “hukbong-dagat” ti Pilipinas ken Japan navy ket nangisayangkat pay kadagiti tactical maneuvering ken photographic exercise iti panaglayagda.
Segun kenni Armed Forces of the Philippines public affairs office chief ni Col. Xerxes Trinidad, ti bilateral sail ket paset ti agtultuloy a panagregget a mangpapigsa iti rehional ken internasional a panagtitinnulong nga agturong iti pannakagun-od ti nawaya ken silulukat nga Indo-Pacific region.
Kinunana a determinado met dagiti dua a pagilyan a mangitandudo ti seguridad ken kinatalged iti Indo-Pacific.
Kabayatanna, naiwayat ti joint sail kalpasan ti bilateral maritime cooperative activity ti Philippine Navy iti US Navy iti West Philippine Sea idi Hulio 31.
