LAOAG CITY – Pinaneknekan manen ti BINI ti balligida iti industria ti musika kalpasan a nakagun-od ti uppat a pammadayaw iti Jupiter Music Awards 2026.
Binigbig ti BINI kas Female Group of the Year ken Most Influential Southeast Asian Artist – Female iti nasao nga awards show.
Saan laeng a grupo ti pinadayawan gapu ta naalada met ti extended play wenno EP a “Signals” ti Album of the Year award.
Kabayatanna, ti kanta ti BINI a “Blush,” a paset ti kapada nga album ti napadayawan kas Song of the Year.
Inpakaammo ti management ti panangkablaaw ti grupo, kunana a ti talent ken panangikagumaan ti BINI ket agtultuloy a mangipapaay ti inspirasion iti minilyon a fans ken tumultulong iti panangpalawa ti musika a Pilipino iti intero a lubong.
Nabukel idi 2024 ti Jupiter Music Awards a maysa a pammadayaw a mangbigbigbig kadagiti nalatak a music artists ken dagiti obrada iti rehion.
Naammoan a kalpasan ti balligi a panaglippas ti “Signals” tour-da idiay Cebu, agsagsagana met ti BINI para iti North American leg ti concert tour-da a mangrugin inton Agosto.
