LAOAG CITY – Inbatad ni Mrs. Marilyn Sapungan, ti Revenue District Officer ditoy probinsya nga ad-adda pay a paigetan da ti Tax evaluation compliance da kas ti panangiyuswat da ti tax mapping.
Daytoy ket kalpasan ti pannakaikkat ti 5-year validity dagiti resibo.
Inlawlawag na a babaen iti tax mapping ket makita latta no siasinno dagiti agit-ited ti resibo kadagiti nagduduma a pagtagilakoan ditoy probinsya.
Innayon na a no kasapulan nga inaldaw nga adda dagiti mapan agsursur kadagiti nagduduma a pasdek negosyo tapno masigurado no agit-ited da ti resibo ket aramiden da.
Maipalagip a naikkat ti 5-year validity dagiti resibo gapu iti ado a reklamo dagiti tax payers no sadinno nga inpetpetteng da a nayun laeng a paggastusan ti kanayun a panagpaprint da ti resibo.
