LAOAG CITY – Inistorya ni Mr. Froilan Suniga iti ili ti Dumalneg iti Bombo Radyo Laoag no kasano ti maipagarop a panangkabil kenkuana ni Vice Mayor Francis Espiritu iti checkpoint iti nasao nga ili.
Segun kenni Suniga, adda ti napateg nga inasikaso na ditoy ciudad ti Laoag para iti negosyo na ken gapo ta rabiin ken naturog iti kasera na ditoy ciudad.
Inadmitir ni Suniga nga idi rimwar iti ili da ket adda ti katulagan a pinirmaan da iti hepe ti Dumalneg a nakailanadan a masapol a dumalan iti 14-day quarantine no agsubli ngem awan ti kopya na.
Gapo iti daytoy, kuna ni Suniga a nagsubli ditoy ciudad ti Laoag ken napan nagpakada kenni Provincial Agriculture Normal Lagmay ken naikkan ti pammalubos a sumrek gapo ta agidel-deliver isuna kadagiti essential goods.
Inlawlawag na nga adda pay ti inted ni Lagmay a dokumento a mangibagbaga a mabalin a sumrek.
Inbatad na nga idi agsubli kuma iti ili ti Dumalneg ket saan a napalubusan gapo ta masapol a malpas na ti quarantine ngem saan na a kayat gapo iti sagsagabaen na a depresyon.
Mainaig iti daytoy, kunana nga idi saan latta a nakastrek ket napan iti ayan da ni Espiritu ken maipagarop a dagus na a tinulpak rason a natulid, intumeng na ken kinugtaran napay daytoy.
Kunana a kalpasan daytoy ket binalakadan isuna ti maysa kadagiti bodyguard ti bise mayor nga umadayo ken nagtungpal daytoy ngem maipagarop sinaruno manen ti opisyal ken insawang na no kayat na ti maparti.
Kuna pay ni Suniga a bayat a mapaspasamak daytoy ket sisasango ni Pol. Lt. Joselito Rigates, ti chief of police ti PNP-Dumalneg ken dagiti dadduma pay a pulis kasta met dagiti frontliners.
Kabayatanna, inlawlawag ni Pol. Lt. Joselito Rigates, ti chief of police ti PNP-Dumalneg nga isuna ti naganawa idi maipagarop a kinabil ni Vice Mayor Francis Espiritu kenni Froilan Suniga.
Segun kenni Rigates, ti pudno a napasamak ket nagsinsinnungbat pay laeng ni Suniga ken ni Espiritu ken ditoy a bimmalaet.
Inadmitir ni Rigates a ti palawag ni Suniga no kasano a nakabkabil ket isu ti napasamak iti nabaetan da iti bise mayor.
Mainaig iti daytoy, kinanunungan pay ni Rigates nga idi immadayo ni Suniga ket sinaruno ti bise mayor rason a napan da met ngem idi nakadanon da iti ayan dagiti dua ket kabkabilenen manen ti opisyal ni Suniga.
Kabayatanna, inbatad ni Rigates nga inyendorso nan iti Ilocos Norte Police Provincial Office (INPPO) ti nasao a pasamak.
Nagkedked met a mangipaay ti komento ni Vice Mayor Espiritu mainaig iti daytoy.
