Gutgutiguten ni Jail Senior Inspector Sheila Marie Sapaden, ti acting jail warden iti Bureau of Jail Management and Penology ditoy ciudad ti Laoag, ti publiko ken dagiti nagduduma nga ahensya ti gobierno nga agorder kadagiti parol ken dadduma a Christmas decorations nga aramiden dagiti Persons Deprived of Liberty (PDLs).
Inbatad na a rugyanen dagiti balud ti agaramid kadagiti parol para iti mapaspasangasangan a paskua.
Kuna na nga adda metten dagiti pakpakauna nga order a naawat da manipod iti sumagmamano nga ili ditoy probinsya.
Inlawlawag ni Sapaden a karaman kadagiti materyales a kasapulan dagiti balud para iti panagaramid da ti parol ket ti kawayan, capiz, papel de hapon, ken pasilaw.
Innayon na a ti panagaramid dagiti balud ti parol ket paset ti livelihood and welfare development program ti Bureau of Jail Management and Penology no sadinno a maikkan da ti gundaway a maaddaan ti pamastrekan uray adda da iti uneg ti pagbalodan.
