LAOAG CITY – Sumangpet intono bigat ditoy Ilocos Norte ti blood relic ni Saint John Paul II manipud idiay Cagayan ken agsursur kadagiti napili a simbaan ditoy probinsya.
Segun kenni Fr. Joey Ranjo, pannakangiwat ti Diocese of Laoag, dumagas ti blood relic iti simbaan idiay Pasaleng Pagudpud ken kalpasan ti maysa nga oras ket mapan iti simbaan iti sentro iti nasao nga ili.
Manipud met iti Pagudpud ket mapan iti simbaan ditoy ciudad ti Laoag sakbay iti simbaan idiay ili ti Bacarra nga isu ti pagumyanan na.
Inbatad na nga iti maikadwa nga aldaw ti blood relic ket agturong met iti simbaan idiay ili ti Dingras, ciudad ti Batac ken iti ili ti Badoc sakbay a mapan idiay Ilocos Sur.
Inlawlawag na a ti blood relic ket kuyugen ti National Youth Cross ken paset ti panagsursur na kadagiti nagduduma a simbaan iti programa para iti Year of the Youth ita a tawen ken kas panagsagana iti maika-500 a tawen ti pannakapagbalin a Kristiyano intono 2021.
Kunana a bassit laeng nga oras ti panagtalinaed ti blood relic ni Saint John Paul II kadagiti bisitaen na a simbaan ken silulukat kadagiti amin a deboto.
Naamoan a ni Saint John Paul II ti maibilang a Father ti World Youth Day ken dakkel ti panagtalek na kadagiti agtutubo.
Kabayatanna, inpakammo ni Ranjo, pannakangiwat ti Diocese of Laoag a malaksid iti blood relic ni Saint John Paul II ket sumangpet pay ita nga aldaw ti Imahen ti Santo Niño de Cebu.
Segun kenni Ranjo, ti imahen ket isu ti inregalo ni Magellan iti Reyna Juana ti Cebu.
Inbatad na a ti imahen ket umyan kadagiti simbaan idiay ili ti Vintar, Piddig ken iti cathedral ditoy ciudad ti Laoag.
Mainaig iti daytoy, kuna ni ranjo a naiget da a nakikoordenar iti Philipiine National Police ken LGU para iti seguridad dagiti deboto.
