LAOAG CITY – Manamnama ti pannakitaripnong ti Bureau of Customs (BOC) iti Independent Commission for Infrastructure (ICI) intono bigat Biyernes, Oktobre 3.
Segun kenni BOC Commissioner Ariel Nepomuceno, daytoy ket tapno maisubmitir dagiti dokumento a kasapulan a makatulong iti imbestigasyon.
Rakurak daytoy ti opisyal kalpasan a naipaina iti BOC ti 13 luxury cars a kukua dagiti agasawa a contractors nga isuda Pacifico “Curlee” ken Cezarah “Sarah” Discaya a karaman iti anomalya iti flood control projects.
Inbatad na a dagiti ummuna a dokumento nga isubmitir da iti ICI ket ti resulta ti inyuswat da met nga imbestigasyon iti luxury cars dagiti Discaya.
Inpasigurado met ni Nepomuceno a makitinnulong da iti ICI ken ipaay da ti aniaman a kasapulan a dokumento para iti imbestigasyon.
