LAOAG CITY – Binallaagan ti Bureau of Customs (BOC) iti publiko maipanggep kadagiti peke a social media accounts nga agus-usar iti nagan ti ahensiada.
Maibasar iti rakurak ti Bureau of Customs, adda dagiti sumagmamano nga indibidual wenno grupo nga agpampammarang a kameng da ti Customs online no sadino a naruayen dagiti nabiktima da.
Adda pay dagiti sumagmamano a nangdakamat iti nagan ni Bureau of Customs Commissioner Bienvenido Rubio tapno makasingir ti gatad para iti alalisto a transaksion dagiti kargamento.
Inlawlawag ti Bureau of Customs nga awan dagiti araramidenda a transaksyon a lumasat iti online platforms ken inpettengda nga amin a transaksion da ket manipud laeng iti opisinada.
Mainaig iti daytoy, nakiuman ti Bureau of Customs iti Cybercrime Investigation and Coordinating Center (CICC) tapno mabigbig ken mapagsungbatan dagiti adda iti likudan ti illegal nga aktibidad.
