LAOAG CITY – Indeklara ti state of calamity ti Bohol Provincial Government gapu iti agtultuloy a panagngato ti kaso ti dengue iti probinsia.
Inrekomendar daytoy ti Sangguniang Panlalawigan iti Bohol Provincial Anti-Dengue Task Force gapu iti napaspas a panagadu ti kaso iti probinsia ken tapno makasagana metten a nasayaat dagiti umili idiay Bohol.
Iti inisyal a report ti Provincial Health Office ti Bohol, mapattapatta a dumanonen iti 5,839 ti pakabuklan a bilang ti nairekord a kaso iti probinsia manipud idi Enero agingga Agosto 24 ita a tawen pakairamanan ditoy dagiti 14 a death cases manipud iti nasao a sakit.
Naammoan a gapu iti kellaat a panagngato ti bilang dagiti kaso, nangipaay ti 10 government-managed hospitals iti probinsia dagiti suplay ti intravenous fluids ken non-structural protein 1 wenno NS1 kits tapno mausar dagiti pasiente kontra iti dengue.
Kabayatanna, gapu iti pannakaideklara ti state of calamity iti lugar, manamnama a mangiyuswat dagiti residente ti clean up drive ken ti nasapsapa a panagpakonsultar kadagiti klinika ken ospital no makarikna ti sintomas gubuay iti makapatay a sakit.
