LAOAG CITY – Umaboten iti 68,257 ti natiliw iti umuna a lawas ti panangipatungpal ti Safer Cities initiative.
Inbatad ni Department of the Interior and Local Government (DILG) Secretary Jonvic Remulla, karaman kadagiti kangrunaan a panaglabsing ti panaginum ken panagsigarilio iti pampubliko a lugar, panagruar a nakauyos wenno awan ti badona iti pangngato, panaglabsing dagiti menor de edad iti curfew ken panagusar ti karaoke a limmabes iti naikeddeng nga oras.
Aminado ti sekretario nga ikagkagumaanda latta a mapasayaat ti programa kas ti nalawlawag a pagannurotan ken ad-adda nga epektibo a panangipatungpal.
Kuna ni Remulla, gagem ti programa a maaddaan ti naurnos ken disiplina iti komunidad, saan a dusaen dagiti ordinario a Pilipino.
