LAOAG CITY – Mamati ni Dr. Christian Andrew Tagami, Top 9 iti Physician Licensure Examination a ti naan-anay a panagtalek na iti Diyos ti kangrunaan a nangiturong iti panagballigi na.
Ni Dr. Tagami ket taga Barangay 11, Sta. Rosa iti ili ti Sarrat ken nagturpos iti Mariano Marcos State University iti ciudad ti Batac.
Inlawlawag na nga iti rimuar ti resulta ti eksaminasyon ket adda isuna idiay Cagayan tapno bisitaen ti nobya na, ken iti dayta a gundaway ket agbasbasa ti biblia.
Kuna na a nagsasaruno dagiti naawat na a chat ken tawag tapno ipakaammo kenkuana a nakapasa iti Physician Licensure Examination.
Innayon na nga iti baet dagiti ado a chat ken tawag manipod kadagiti kapamilya ken papagayam na ket intultuloy na ti nagbasa ti bibilia.
Kuna na a saanna a mailadawan ti riknana iti dayta a gundaway ngem ti ad-adda a timmatak iti panunot na ket ti panagyaman na iti Diyos gapu ta saanna a binaybay-an iti panageksamen na.
Inyistorya ni Dr. Tagami a sipud panagadal agingga iti panageksamen na ket ti laeng namarsua ti kangrunaan a nagkaptan.
Inrakurak na a kabayatan ti panageksamen na ket naiget ti panagkararagna aglalo kadagiti karirigatan a paset ti eksaminasyon.
Inadmitir na nga idi rinugyan na ti nageskwela tapno mangala iti medisina ket addan iti panunot na ti panagkalikagom na a mapadasan ti agbalin a Top notcher tapno maamoan no kasanu ti riknana, banag a dakkel ti panagyaman na iti Diyos gapu ta natungpal daytoy nga arapaap na.
Kabayatanna, inbatad ni Dr. Tagami a ti kangrunaan a nagbalin a karit iti panagadal na iti medisina ket idi panawen ti pandemya gapu ta saan laeng a ti panageskwela na ti panpanunuten na no di ket ti pay kinatalged ti salun-at ti pamilya na.
Mainaig iti daytoy, inpakaammo ni Dr. Tagami a ti sumaruno nga aramiden na kalpasan a nakapasa iti eksaminasyon ket ti agserbi kas Doctor to the Barrios, ngem iyur-uray na paylaeng no sadinno a lugar ti panangikabilan da kenkuana gapu ta scholar daytoy ti Department of Health.
