LAOAG CITY – Mamati ti International Olympic Committee (IOC) a naan-anayen a mairaman ti boxing iti 2028 Los Angeles Olympics.
Inbatad ni International Olympic Committee chief Thomas Bach a nakabukelen ti baro a governing body ti boxing.
Inaprobaran ti Executive Board ti International Olympic Committee ti boxing iti 2028 program kalpasan a binigbig ti World Boxing nga isu ti mangimaton iti nasao nga sports iti Olympics.
Naammoan a tapno naan-anay a mairaman iti sports ket kasapulan pay laeng nga umuna a naan-anay nga aprobaran ti 100 a miembro ti International Olympic Committee kadagiti sumaruno nga aldaw.
Maipalagip a ti International Olympic Committee ti nangorganisar ti boxing tournaments idi Tokyo Olympics 2021 ken Paris Olympics iti napalabas a tawen kalpasan ti panagsisina ti International Boxing Association ti Russia gapu iti kuarta, panangidaulo ken saan a panagkaykaysa.
